पुणे प्रतिबिंब

नववर्षाचं स्वागत "पार्टी मुड'मध्ये आपण सारेच करतो. निर्माण भारती फौंडेशन या स्वयंसेवी संस्थेनं मात्र गेले तीन वर्षे वेगळाच "मुड' जोपासला आहे, जो अगदी अनुकरणीय आहे.

"पार्टी'करून परतणाऱ्या काहींना अत्यंत दुर्देवी घटनांना सामोरे जावे लागते. बेधुंद अवस्थेत वाहने चालविताना अपघातही होतात. "निर्माण भारती'ने रात्री अकरा ते पहाटे पाच वाजेपर्यंत पुण्यात कात्रज, कात्रज डेअरी, शारदा आर्केड, पौड रोड आदी ठिकाणी जागता पहारा ठेवला आणि पाच जखमींना अगदी योग्यवेळी उपचार मिळवून दिले. "निर्माण भारती'ने त्यासाठी स्वतःची व्हॅनही सज्ज ठेवली होती.
पुण्याचा वाढता पसारा पाहता, अशा स्वयंसेवी संस्थांची तीव्र आवश्‍यकता जाणवते आहे. वेगवेगळ्या क्षेत्रात सेवाभावी कार्य करण्याची इच्छा असणाऱ्यांना अशा संस्था व्यासपीठही देत आहेत. "निर्माण भारती'सारख्या आणखीही संस्था पुढे याव्यात आणि पुण्यातील वाहतूक समस्या, प्रदूषण यावरही मार्ग निघावा, एवढीच इच्छा !