पुणे प्रतिबिंब

उद्या, म्हणजे रविवारी जागतिक हास्य दिन आहे. खरंतर हसण्यासाठी वर्षातील सर्व दिवस ठेवायला हवेत. आजच्या ताणतणावांच्या जमान्यात हसणे हे मोठे औषध आहे. हसण्याचे मानसिक आणि शारीरिक पातळीवर खूप चांगले परिणाम होतात. अनेक शास्त्रज्ञांनी यावर विविध प्रकारे संशोधन करून अनेक निष्कर्ष काढले आहेत. हसण्याचे मानवी शरीरावर तीन प्रकारे परिणाम दिसून येतात.
जैवभौतिकी, जैवरासायनिक, जैवऊर्जित.
जैवभौतिकी परिणाम : हसण्यामुळे शरीरातील लसिका द्रव्य शरीरात वेगाने फिरू लागते. त्यामुळे शरीरातील अनावश्‍यक पेशी, घटक बाहेर टाकण्यास मदत होते. हसण्यामुळे शरीरातील प्रत्येक अवयवाला पेशीला प्राणवायूचा भरपूर पुरवठा होतो. मानवी शरीरात असणारे अनेक विषाणू, जिवाणू, अतिरिक्त प्राणवायूमध्ये जिवंत राहू शकत नाही.
हसण्याच्या प्रक्रियेमुळे शरीरातील रक्ताभिसरण चांगल्या प्रकारे होते.
जैवऊर्जित परिणाम ः
पोट, चेहरा, खांदे, मान इत्यादीच्या स्नायूंना उत्तम व्यायाम मिळतो.
पोट धरून हसल्यामुळे फुफ्फुसाखालील डायफ्राम नावाच्या स्नायूची मोठ्या प्रमाणात हालचाल होते. त्यामुळे श्‍वसनप्रक्रिया सुधारते.
जैवरासायनिक परिणाम ः"इंटरफेरॉन', इंटरल्युकीन या रसायनांचे प्रमाण शरीरात वाढते. त्यामुळे जिवाणू, विषाणूंपासून मानवाचे संरक्षण होते. शरीरातील झीज भरून येण्याची प्रक्रिया वेगाने घडते.
इविनेफ्रिन, कॉर्टिसोल, डोपॅक इत्यादी घातक रसायनांचे शरीरातील प्रमाण कमी होते.
ताणतणाव व त्या अनुषंगाने शरीरावरील दुष्परिणाम कमी होण्यास मदत होते.
रक्तवाहिन्यांचे आकुंचन होण्याचे प्रमाण कमी होते.
इतर फायदे ः हसण्याच्या प्रक्रियेमुळे काही काळ का असेना, व्यक्तीला दुःखाचा विसर पडतो, वेदना कमी जाणवायला लागतात, रक्तदाब नॉर्मल राहतो. खळखळून हसण्यामुळे पोटातील स्नायूंना व्यायाम मिळतो. हा व्यायाम "इंटर्नल जॉगिंग' या प्रकारात येतो. ज्या रुग्णांना हृदयविकाराच्या झटक्‍यानंतर धावणं शक्‍य नसतं, त्यांच्यासाठी खळखळून अथवा पोट धरून हसणं, हा रामबाण उपाय आहे.
शरीरावरचे आणि मनावरचे घाव भरून येण्यासाठी हसणं, हा उत्तम उपाय आहे.
हसण्यामुळे कल्पकता वाढते. नवजीवन आणि नवचैतन्य मिळतं. नात्यांमध्ये आपुलकी आणि प्रेम वाढतं.