पुणे प्रतिबिंब

शहर आणि जिल्ह्याच्या मागणीनुसार डिझेलपुरवठ्यात वाढ करण्याचे आश्‍वासन तीनही इंधन कंपन्यांच्या अधिकाऱ्यांनी जिल्हाधिकारी कार्यालयात झालेल्या बैठकीत दिले.मात्र, त्यानुसार पुरवठ्यात वाढ न केल्याने वाहनचालकांना आजही डिझेलसाठी फिरण्याची वेळ आली. माहिती तंत्रज्ञान, "बीपीओ' कंपन्या; तसेच मॉल्सकडून मागणीत अचानक वाढ झाल्याने डिझेलटंचाई निर्माण झाल्याचे कारण कंपन्यांच्या अधिकाऱ्यांनी बैठकीत पुढे केले. मात्र, येत्या दोन दिवसांत पुरवठ्यात सुधारणा करण्याचे आश्‍वासनही त्यांनी दिले.

शहर आणि जिल्ह्यात दररोज तीन हजार किलोलिटर डिझेल लागते. प्रत्यक्षात, दीड हजार किलोलिटर पुरवठा गेल्या काही दिवसांपासून होत आहे. इंडियन ऑइल कॉर्पोरेशनने त्यांच्या महिन्याच्या साठ्याची विक्री वीस दिवसांत केल्याने त्यानंतर त्यांनी एक हजारऐवजी २९५ किलोलिटरपर्यंत पुरवठ्यात कपात केली. डिझेलटंचाईला ही कपात कारणीभूत ठरली.

भारत पेट्रोलियम आणि हिंदुस्थान पेट्रोलियम प्रत्येकी ८०० किलोलिटर, तर इंडियन ऑइल ४५० किलोलिटर पुरवठा करणार आहे; तसेच यापुढे प्रत्येक साठ्याचे महिन्याचे नियोजन करताना महिनाभर समान पुरवठा करण्याचे तंत्र अवलंबिण्याचा निर्णय बैठकीत घेण्यात आला. त्यामुळे लवकरच डिझेलपुरवठा सुरळीत होईल, अशी अपेक्षा आहे.

माहिती तंत्रज्ञान, बीपीओ आणि मॉल्सकडून डिझेलच्या मागणीत अचानक वाढ झाल्याने टंचाई निर्माण झाल्याचे कारण कंपन्यांच्या अधिकाऱ्यांनी पुढे केले असले, तरी कृत्रिम टंचाई निर्माण करण्याचा या कंपन्यांचा प्रयत्न असू शकतो. अशाप्रकारे टंचाई निर्माण करायची आणि काळ्या बाजाराने त्याची विक्री करायची, असा कट या कंपन्यांनी रचलेला दिसतो. आपल्याला काय वाटते?