पुणे प्रतिबिंब

"हल्लीच्या तरुणांना सामाजिक भान राहिलेलेच नाही,' अशी टीका गणेश विसर्जन मिरवणुकीदरम्यान हमखास होते; मात्र मिरवणुकीत गुलाल उधळणारे, नाचण्यासाठी उंचावणारे हात पर्यावरण रक्षणालाही तितक्‍याच तत्परतेने सिद्ध होतात, याचा प्रत्यय पुणेकरांना आला. सिंबायोसिस, एमआयटी, भारती विद्या भवन अशा पुण्यातील 12 शैक्षणिक संस्थांमधील दोन हजार विद्यार्थ्यांनी मुठा नदीकाठाची स्वच्छता करून, तरुणांनाही पर्यावरण रक्षणाचे भान आहे, याची जाणीव करून दिली.

"फ्रेंड्‌स सोसायटी अँड आयएमएफ' संस्थेच्या "इंटरनॅशनल कोस्टेल क्‍लीनअप' या प्रकल्पांतर्गत ही मोहीम राबविण्यात आली. त्याअंतर्गतच बाबा भिडे पूल, म्हात्रे, लकडी, एस. एम. जोशी आणि बंडगार्डन पूल अशा पाच पुलांजवळील नदीकाठ स्वच्छ करण्यात आले. गणेश विसर्जन काळात निर्माण झालेला कचरा गोळा करणे हा एकमेव उद्देश न ठेवता कचऱ्याच्या वर्गीकरणावरही भर दिला गेला. त्यासाठी हिरव्या व काळ्या रंगांच्या पिशव्यांमधून अनुक्रमे विघटन केलेला आणि अविघटित कचरा गोळा करण्यात आला. केवळ सिंबायोसिसच्या सहाशे विद्यार्थ्यांनी एकत्र येऊन बाबा भिडे पुलानजीक शंभर पिशव्या कचरा गोळा केला. त्याला कोथरूड येथील भारती विद्या भवन शाळेतील दीडशे चिमुकल्यांनी हातभार लावला. त्यामुळे एरवीही शुकशुकाट असलेला नदीकाठ गणेश विसर्जनाप्रमाणे गजबजून गेला होता. सकाळी साडेनऊ ते अकरापर्यंत ही मोहीम सुरू होती. त्यामध्ये "फ्रेंड्‌स'च्या प्रतिनिधींसह शाळेचे शिक्षकही सहभागी झाले होते. आतापर्यंत मोहिमेचे तीन टप्पे पार पडले असून, ता. 13 ऑक्‍टोबरला चौथ्या; तसेच अखेरच्या टप्प्यातील कचरा गोळा करण्यात येणार आहे. विघटित स्वरूपातील कचरा पुनर्वापरासाठी पाठविण्यात येणार असून, अविघटित कचरा महापालिकेच्या उरुळी देवाची येथील कचरा डेपोत पाठविण्यात येणार आहे, असे संस्थेचे संकेत देशपांडे यांनी सांगितले.